Per s-chars 16 milliuns francs dess gnir realisada la seguond’etappa da la sanaziun da l’Ospidal Engiadina Bassa. Tanter oter gnissan renovats il tract per operar sco eir la plazza da splachar per l’elicopter.
«Avant ses ons es gnü fundà il Center da sandà Engiadina Bassa (CSEB), in quists ons s’haja pudü s-chaffir 50 nouvas plazzas da lavur, da quellas sun ot plazzas da giarsunadi», ha dit Philipp Gunzinger, il directer dal CSEB in gövgia a Scuol a chaschun d’üna conferenza da pressa, «ün da noss partenaris principals es l’Ospidal d’Engiadina Bassa (OEB) a Scuol.» I’ls ons 2006 e 2007 es gnüda realisada la prüm’etappa da la sanaziun totala da quist ospidal regiunal. «Uossa stuvaina tour per mans la seguond’etappa da la sanaziun, respectivamaing renovaziun», ha cuntinuà Victor Peer, il president dal cussagl da fundaziun dal CSEB, «i s’es uossa landervia insembel culs cumüns ad elavurar ün model da finanziaziun per quistas lavuors.» El e Joachim Koppenberg, il directer da l’OEB e president da la cumischiun da planisaziun, han preschantà il proget.
«Davo 35 ons temp da renovar»
Sco cha Victor Peer ha dit es la renovaziun dal tract d’operaziun l’elemaint central da la seguond’etappa da sanaziun: «Il tract existent d’eira gnü fabrichà dal 1978 e’s rechatta per part i’l implant da la protecziun civila da l’ospidal.» El suppuona cha l’OEB sarà ün dals ultims ospidals ingio chi vain operà i’l schler da protecziun. «I’ls ultims 35 ons han la medicina e cun ella eir ils indrizs tecnics fat ün tal svilup cha l’infrastructura existenta nu correspuonda plü a las pretaisas d’hozindi.» Perquai sto quel gnir renovà per cuosts da bundant 13 milliuns francs. Per 900’000 francs dess gnir sanà eir il tet da quist tract e per s-chars 180’000 francs l’agregat per l’electricità in cas d’interrupziuns da l’energia. Illa seguond’etappa da sanaziun sto gnir renovada eir la plazza da splachar per l’elicopter, la quala ha ün’età da 21 ons: «Intant cha quella jada pasaiva ün elicopter var 800 kils hana hozindi in media ün pais da var 3,5 tonnas. Perquai pretenda l’Uffizi federal per aviatica civila Bazl üna nouva plazza da splachar.» Ils cuosts per quella importan bundant ün milliun francs. Per ch’ella tegna fin da prümavaira vain la plazza existenta rinforzada provisoricamaing.
«Gestiun adüna garantida»
L’OEB es cun 100 plazzas da lavur cumplainas ün dals importants patruns da lavur da la regiun. Joachim Koppenberg ha manzunà eir las nouvas sportas chi sun gnüdas introdüttas i’l ospidal a Scuol i’ls ultims ses ons: «La sporta da medicina integrativa e cumplessiva per exaimpel es unica in Svizra, e lura vaina amo las differentas uras da consultaziun per oncologia, dermatologia, malatias da gula-nas-uraglias ed oter plü.» Perquai ha l’OEB uossa eir daplü paziaints co avant la prüm’etappa da sanaziun: «Da l’on 2006 vaina dombrà 961 e l’on passà 1156 paziaints staziunaris, quai significha ün augmaint da 20 pertschient», ha dit Koppenberg, «il numer da paziaints ambulants s’ha perfin augmentà per 46 pertschient o 2131 paziaints sün 6750 paziaints.» El ha preschantà ils avantags dal proget per ün nouv tract d’operaziun. La votumaziun davart l’ultima etappa da la sanaziun da l’OEB es als 3 da marz 2013. «Scha la populaziun d’Engiadina Bassa disch schi al proget schi pudaina cumanzar a fabrichar da prümavaira», ha dit il directer da l’OEB, «ed eir dürant il temp da fabrica es la gestiun da l’ospidal adüna garantida.»
Bericht in der Engadiner Post vom 22. Dezember 2012