Anestesiologia & terapia cunter dolurs

L’incumbenza principala da l’anestesiologia es üna metoda da narcosa chi’d es accordada individualmaing al paziaint. Davo l’operaziun pisseran ils meidis d’anestesia per üna terapia cunter dolurs ideala.

Ils anestesists sun sco meidis d’urgenza eir üna part dal team da salvamaint. La partiziun spordscha ultra da quai üna consultaziun da la dolur ambulanta sco eir üna terapia cunter dolurs staziunaria. Üna collavuraziun stretta tanter ils meidis da chasa e’ls meidis specialists pussibiltescha üna chüra minuziusa ed optimala dal paziaint.

Terapia cunter dolurs

L’ospidal dispuona d’ün concept da terapia cunter dolurs tschertifichà. Dolurs postoperativas vegnan trattadas da maniera sistematica e consequenta. Applichats vegnan eir cateters moderns cunter dolurs cun pumpas cunter dolurs.

In cas da dolurs cronicas po il meidi da chasa arrandschar üna consultaziun davart üna terapia cunter dolurs ambulanta. Illa consultaziun vegnan analisadas las dolurs ed i vain elavurà ün concept da terapia individual. La terapia cunter dolurs po gnir realisada cun medicamaints. I dà però eir numerusas uschedittas tecnicas d’infiltraziun invasiva. Quistas vegnan realisadas eir suot controlla da radiografia e d’ultrasun cun üna tecnica fich moderna. In cas cronics schelts e cumplexs vegnan spüerts trattamaints staziunaris. Quists succedan in collavuraziun stretta cun meidis da chasa e las otras partiziuns specialisadas da l’ospidal.

La partiziun es da vart da la Società svizra pel stüdi da la dolur (SSSD) tschertifichà sco center da la dolur e dispuona da specialists da la dolur specials (SSIPM, SSSD, medicina psicosomatica).

Broschüra – terapia cunter dolurs davo ün’operaziun