cseb-osp-physiotherapie-1
Copchar la colliaziun i'l archiv provisoric. Copchà!

Fisioterapia

Il center da cumpetenza per fisioterapia in Engiadina Bassa suot il tet dal Center da sandà Engiadina Bassa (CSEB) spordscha seis servezzans a l’Ospidal Scuol e Clinica Curativa, i’l bogn d’aua minerala Bogn Engiadina Scuol ed illa chasa da chüra Chasa Puntota e vain coordinà in möd central e professiunal. Ellas/Els chattan in tuot noss lös ün vast spectrum da terapias ed üna gronda tscherna da specialists chi’s perfecziuneschan cuntinuadamaing. Il böt da la fisioterapia es d’elavurar cun Ellas/Els andamaints dals movimaints e funcziuns optimalas per tillas integrar i’l minchadi, illa professiun ed i’l sport. Quai succeda tant cun terapias activas sco eir passivas. Il team da la fisioterapia CSEB sustegna ed accumpogna ad Ellas/Els sün quista via cun ün trattamaint ed üna cussagliaziun chi’d es adattada individualmaing a Lur problematica. Lapro ans sta fich a cour da promouver la respunsabiltà persunala per ragiundscher ils böts formulats cumünaivelmaing.

Nossas spüertas

 

Terapia da’s mouver

Cun exercizis chi sun adattats individualmaing al paziaint vain amegldrada la movibiltà, sviluppà forza, cundiziun, coordinaziun ed equiliber cun la mera d’obtegner üna statura optimala.

Fisioterapia da sport

La fisioterapia da sport as basa sün la medicina da sport, la scienza da trenamaint e la fisioterapia e cuntegna l’assistenza fisioterapeutica da sportists da tuot las classas da prestaziun sco eir quella da paziaints davo mals e feridas vi da l’apparat motoric.

Terapia da trenamaint medicinala (TTM)

Il böt da la terapia da trenamaint medicinala es da restabilir ed amegldrar las funcziuns muscularas sco forza, cundiziun, stabilità e coordinaziun. TTM regulara sustegna ils process da reabilitaziun ed amegldrescha funcziuns corporalas insufficiaintas.

Terapia da l’aua

Movimaints reuschischan ill’aua suvent plü liger co sün terra. Il motiv per quai es l’impulsiun da l’aua chi renda plü simpel d’exercitar ill’aua e schanaja quatras las lisüras. Las funcziuns fisicalas (impulsiun, resistenza, chod) vegnan applichadas consciaintamaing dal terapeut per fuormar ün program d’exercizis adattà al paziaint. La terapia da l’aua vain natüralmaing fatta i’l bogn d’aua minerala Bogn Engiadina. Ün evenimaint terapeutic extraordinari.

Fisioterapia pediatrica

Il trattamaint in cas da naschentschas prematuras, da poppins, d’uffants pitschens, uffants e giuvenils cun problems specifics per uffants: applichadas vegnan in quist connex metodas da terapia correspundentas. Il trattamaint vain adattà al stadi da svilup sensomotoric da l’uffant.

Terapia manuala

La terapia manuala es üna fuorma da trattamaint chi’s lascha applichar in blers cas da disturbis dal movimaint acuts o cronics vi dal spinal ed otras lisüras, musclas e nervs.

Tecnicas miofascialas per las parts lommas

Cun agüd da tecnicas miofascialas fastizia il terapeut disturbis da la funcziun da las musclas e fascias e tillas tratta. In quist connex applichescha el differentas tecnicas da schmachar e trar chi stimuleschan tanter oter la circulaziun dal sang i’l tessü e dessan avair uschè ün meglder effet sün la tensiun dal tessü.

Taping

Cun metter sü implasters kinesiotics, implasters myofascials o üsitats vegnan stabilisadas o influenzadas lisüras, musclas o eir lioms. Lur funcziun vain quatras sustgnüda o tensiuns vegnan normalisadas ed equilibradas.

Terapia punctuala trigger

Ils böts d’üna terapia punctuala trigger sun da schlockiar indüridas muscularas localas (puncts trigger) e d’amegldrar la circulaziun dal sang.

Dry needling

«Dry needling» cumplettescha efficaziamaing la terapia punctuala tigger. In quist connex vain fourà cun üna guoglia fina fich precis aint il punct tigger chi’d es respunsabel pels mals actuals. Cun quai vegnan schlockiadas las gramfchas, amegldrà la situaziun locala da la circulaziun dal sang e sbassadas las reacziuns d’inflammaziun localas.

Terapia viscerala

Il böt da quist concept da trattamaint integrativ manual es da trattar disturbis da la funcziun da l’apparat motoric cun agüd dal sistem d’organs e da manar inavo il corp darcheu in seis equiliber.

Terapia da respirar

Terapia da respirar reflex (TRR): Il böt principal es quel da sustegner e stimular cun diversas manipulaziuns il torax, il diafragma, la musculatura da respirar auxiliara e’l sistem da la nerva correspundent in lur funcziun. Quai pissera uschè per üna respiraziun resp. expiraziun da reflex. Spirotiger®: Il Spirotiger® es ün urdegn d’exercizi mobil chi rinforza la musculatura da respiraziun e dal corp cun til dovrar regularmaing, augmainta il volumen da respirar ed amegldrescha il barat da gas dals pulmuns. L’urdegn es adattà tant per paziaints in connex cun üna terapia da respirar sco eir per sportists per intents d’ün trenamaint cardiovascular.

Drenascha manuala da las limfas e terapia da decongestiun fisicala cumplexa

Es üna fuorma da massascha chi promouva la drenascha limfatica per redüer uschè ufladüras. Quist po gnir sustgnü cun bandaschas da cumpressiun.

Terapia da nattas

Cun üna tecnica speciala vegnan terapadas las nattisaziuns diagnostichadas.

Concepts da trattamaint neurologics

In cas da malatias dal sistem da nervas central e perifer (paralisa d’üna vart dal corp, trauma da la chavazza e dal tscharvè, sclerosa multipla e malatia da Parkinson) vain applichà il concept Bobath, la Facilitaziun Proprioceptiva e la tecnica-E tenor Hanke.

Reabilitaziun dal fuond dal batschigl

Il fuond dal batschigl sustegna ils organs interns sco la vaschia, il bögl e la madra. Scha la musculatura dal fuond dal batschigl vain disturbada in sia funcziun, saja quai pervi d’üna deblezza o massa gronda tensiun da las musclas, po quella gnir influenzada in möd positiv cun ün trenamaint intenziunà.

Trenamaint autogen

Üna metoda scientifica, cun la quala i’s ragiundscha svess üna detensiun profuonda.

Ultrasun

Ultrasun terapeutic cumpiglia l’applicaziun d’uondas acusticas cun üna frequenza da vibraziun sur la frequenza d’udida. L’ultrasun effettuescha üna circulaziun dal sang rinforzada, ün metabolissem cellular amegldrà sco eir üna reducziun da las dolurs.

Terapia cun uondas da schoc (terapia cun uondas da schoc extracorporala focussada)

Uondas da schoc sun impuls acustics richs d’energia e specialmaing cuorts. Prodots d’ün generatur vegnan transportadas las uondas da schoc sün las zonas da dolur aint il corp uman, ingio ch’ellas fan lur effet terapeutic. Las forzas autocurativas aint il corp vegnan stimuladas ed accelereschan uschè ils process da guarischun.

Electroterapia

Cun l’electroterapia vain lavurà cun differents curraints energetics. Tuot tenor la fuorma da curraint (frequenza, amplituda, spectrum d’impuls etc.) po gnir effettuà ün surleivg da dolurs, üna promoziun da la circulaziun dal sang, üna detensiun o ün rinforzamaint da la musculatura, ün augmaint dal metabolissem o üna resorpziun da l’edem.

Massascha tenor Breuss

La massascha tenor Breuss es ün trattamaint fin e sensibel da la spina dorsala. Sco massascha da la rain energetic-manuala po ella schlockiar bloccadas mentalas, energeticas e corporalas e s’adatta fich bain per schlockiar musculatura aira.

Bogn d’acid carbonic

Aint il center da terapia dal Bogn Engiadina Scuol vain dovrada l’aua curativa in fuorma da batschigls da bogn singuls tenor aspets da la medicina. Las funtanas termalas chi vegnan ütilisadas qua muossan concentraziuns d’acid carbonic bler plü otas co la media al cunfin da saturaziun. Ella serva tanter oter per promouver la circulaziun e per calmar il sistem da la nerva. Ultra da quai ha ella ün effet chi mitigescha la dolur ed impedischa malatias bacterialas.

a la pagina-web dal CSEB
Schliessen

Notfall 144

Unter folgenden Nummern erreichen Sie den hausärztlichen Notfalldienst rund um die Uhr:

  • 081 864 12 12 für die Region Scuol
  • 081 856 12 15 für die Region Zernez
  • 081 861 81 11 für die Region Samnaun

Unter der Nummer 081 861 10 00 erreichen Sie rund um die Uhr die Notfallstation des Ospidal.

Den nächsten AED-Standort im Unterengadin finden Sie auf unserer Übersicht.

REGA1414
Tox-Info145
Polizei117
Feuerwehr118
Dargebotene Hand143
Strassenzustand163
Lawinenbulletin187
Jugendnotruf147