Sia persuna da contact

Chasas da chüra

Pagina iniziala Intrapraisas Chüra Chasas da chüra

Chasas da chüra

Pro las spüertas staziunarias appartegnan:

chüra staziunaria da lunga dürada in cas d’ün domicil fix o chüra transitoria
lets da dis-charg e da vacanzas (l’adöver dals lets da vacanzas es limità per ün temp da 4 eivnas)
assistenza da di/not
assistenza in situaziuns da chüra d’urgenza
assistenza in situaziuns palliativas
cinestetica pro la chüra e l’assistenza

Chasa da chüra Chüra Lischana

La chasa da chüra «Chüra Lischana» es integrada i’l ospidal a Scuol. Quai pussibiltescha ün’assistenza optimala concernent la medicina e la chüra. L’instituziun spordscha ün nouv dachasa a persunas plü veglias chi nu pon plü abitar in lur ambiaint prüvà. L’assistenza es persunala ed individuala e’ls abitants profitan da divers avantags d’ün ospidal. Uschè eir d’üna cuschina frais-cha, regiunala e stagiunala sco eir d’üna cafetaria. Tuot las stanzas sun cleras, prüvadas e spordschan mincha confort. Il persunal da chüra ha in mera da promouver e mantegner las abiltats spiertalas, corporalas e socialas dals abitants. Il provedimaint es garanti eir in cas d’ün grond bsögn da chüra. Amalats da demenza e persunas cun modificaziuns psichicas vegnan assistits e chürats integrativamaing.

Spüerta in detagl

«Nossa fermezza es la vicinanza a l’ospidal. Nus profitain dals meidis sco eir da la fisioterapia directamaing in chasa. Illa Chüra Lischana mettain nus grond pais sün üna chüra ed assistenza individuala.»
Christian Grabner | Manader da la chasa da chüra Chüra Lischana

Center da sandà Engiadina Bassa
Chüra – chüra & assistenza
Chasa da chüra Chüra Lischana
Via da l’Ospidal 280
CH-7550 Scuol

Tel. +41 81 861 10 39

phlischana@cseb.ch

Al planisader da rutas

Chasa da chüra Chasa Puntota

La chasa da chüra “Chasa Puntota” a Scuol es ün lö, ingio chi abitan persunas chi han dabsögn da sustegn e chi possan passantar lur vita uschè autonom sco pussibel. Las abitantas e’ls abitants dessan as sentir bain qua – cun tuot lur adüs ed aigna istorgia. La Chasa Puntota spordscha üna chüra ed assistenza cumpetenta, orientada als abitants e cumplessiva. Bainesser, sgürezza, efficacità e rendabilità sun la pozza da la gestiun. Las 65 stanzas d’ün let pon gnir indrizzadas tenor agen giavüsch.

Per l’assistenza sun partecipadas diversas gruppas da lavur. Ils bsögns e giavüschs individuals da las abitantas e dals abitants stan i’l center d’attenziun. Ils collavuraturs e las collavuraturas inscuntran ad Ellas/Els cun respet, amiaivlezza e stima. Autonomia, protecziun e sgürezza vegnan promovüdas e pussibiltadas cun üna structuraziun dal minchadi ch’Ellas/Els cundecidan.

Gruppa da chüra protetta «Dschember» per persunas cun üna demenza

La gruppa da chüra “Dschember” es ün lö particular. Ella s’ha specialisada sün l’assistenza e la chüra da persunas dementas. Quistas han dabsögn da la protecziun e dal sustegn da nus tuots. Nos böt es da pudair spordscher a quistas persunas la megldra qualità da viver pussibla.

Cuschina

Il team da chadafö spordscha mincha di pasts variats ed equilibrats. Tuot tenor ils bsögns o ordinaziun medicinala ed eir davo consultaziun cun la cussagliaziun da nudrimaint pon gnir preparadas las spaisas eir individualmaing. Confamiliars e visitas pon as partecipar als pasts sün giavüsch e sün preavis (Per ün giantar esa da’s preannunzchar infin il plü tard il di precedaint a las 12.00).

Cafetaria

La cafetaria sta a disposiziun a tuots abitants e tuottas visitas. Per predschs favuraivels survegnan ils giasts üna vasta spüerta da bavrondas e dutscharias. La cafetaria es averta mincha di da las 13.30 fin a las 16.30.

Gugent as pon Els annunzchar pel giantar sur il mail chasapuntota@cseb.ch Nus giavüschain da far l’annunzcha almain 24 uras ouravant. Annunzchas da cuorta dürada nu vegnan acceptadas.

Spüerta in detagl

«Il persunal da la Chasa Puntota as distingua cun üna chüra cumpetenta ed amuraivla. La terapia d’activaziun spordscha ün program multifari da divertimaint e d’occupaziun e l’üert invida a star pachific. La Chasa Puntota es ün lö d’inscunter cun sia plazzetta sulagliva e la cafetaria prüvada.»
Uwe Höllrigl | Manader da la chasa da chüra Chasa Puntota