altes-badehaus
Copchar la colliaziun i'l archiv provisoric. Copchà!

La lunga tradiziun dal turissem termal

Las funtanas d’aua minerala da Scuol e Tarasp attiran fingià daspö tschientiners a giasts in Engiadina Bassa. Fingià dal 1369 sun gnüdas manzunadas in scrit la prüma jada las funtanas d’aua minerala e lur forzas curativas.

La culminaziun ha ragiunt il turissem termal in Engiadina Bassa illa seguonda mità dal 19-avel tschientiner. Dürant il temp dal 1864 fin 1915 es gnüda fabrichada la gronda part dals hotels a Scuol ed i’ls contuorns. Stabilimaints da cura, büvettas e pavigliuns da baiver aua, chasas per far il bogn e nouvs inchaschamaints d’aua minerala sun gnüts s-chaffits. La Büvetta da Tarasp o l’hotel Scuol Palace da var 150 ons dan amo hoz ün’impreschiun da la cultura da bogns da quella jada.

Ün evenimaint social

Avant var tschient ons d’eira Scuol – quella jada amo nomnà Schuls – cuntschaint sco “La raïna da bogns da las Alps”. Meidis renomnats han rendü cuntschaint a l’ester il lö da cura cun lur publicaziuns scientificas. Il manzun da las funtanas d’aua minerala da Schuls-Tarasp-Vulpera nu mancaiva in ingün cumpendi da la medicina. Blers turists sun gnüts da dalöntsch nanpro e tuornats darcheu minch’on – na be per motivs da sandà, mo surtuot eir per motivs socials. Far il bogn, mangiar, sotar e far sport da cumpagnia e na l’ultim far affars, quai staiva sül program. Commembers da famiglias nöblas da tuot l’Europa, industrials, artists e politikers cuntschaints faivan ün viadi a Schuls-Tarasp per far üna cura. Els restaivan suvent üna stà intera in Engiadina Bassa.

Bogn_Engiadina_Übersicht_2
Copchar la colliaziun i'l archiv provisoric. Copchà!

Il cumanzamaint da l’odiern Bogn Engiadina Scuol

I’l center dal cumün da Scuol es gnüda fabrichada dal 1878 la chasa per far il bogn cun vainch cabinas da bogn. I’s trattaiva da cabinas, ingio chi staiva adüna üna bognera da lain. Pels bogns gnivan colliadas las funtanas d’aua minerala Sotsass e Vi directamaing cun la chasa per far il bogn. La quantità da las cabinas da bogn es gnüda augmantada cuntinuadamaing fin dal 1948. Cun introdüer la stagiun d’inviern i’ls ons tschinquanta es gnüda drizzada aint dal 1956 la chasa per far il bogn per la gestiun d’inviern. A partir da quist mumaint haja dat spüertas sco fango, bogns, massaschas e curas da baiver aua.

L’on 1985 ha installà il cussagl cumünal da Scuol üna cumischiun cun nom “Center da cura” sco eir diversas gruppas da lavur. Il böt d’eira quel da construir üna nouva e moderna chasa da far il bogn. Dal 1988 ha approvà la populaziun il credit per realisar il nouv center da bogns. Il Bogn Engiadina Scuol (BES) es gnü fabrichà in ün temp da construcziun da bundant trais ons. Als 1. marz 1993 es el gnü drivi solennamaing. Il bogn d’eira ün dals plü moderns da las Alps. Sco prüm bogn da divertimaint in Svizra ha’l pudü spordscher ün bogn roman-irlandais.

Il nouv center da bogns e wellness cun spüertas da terapia s’ha sviluppà bain svelt ad ün factur economic important per l’Engiadina Bassa. El ha procurà a Scuol per ün turissem termal modern chi cumplettescha fich bain las spüertas turisticas existentas ed augmainta sia valur. Il BES es cun var tschient plazzas da lavur ün dals plü gronds patruns da lavur da la regiun. L’investiziun da passa 50 milliuns francs es bain statta üna decisiun curaschusa per ün cumün da 2000 abitants. Dal punct da vista da l’economia publica s’ha però verifichada quista decisiun.

FUNDAZIUN PRO AUA MINERALA

La fundaziun ha per mera da mantegner e promouver las funtanas d’aua minerala e seis contuorns i’l intschess da la “Fanestra d’Engiadina Bassa” (geologic). Ultra da quai dessan cugnuschentschas davart quistas funtanas sco eir sia istoriga gnir promovüdas e rendüdas accessiblas a la generalità.

Daplü davart la «pro aua minerala»

a la pagina-web dal CSEB
Schliessen

Notfall 144

Unter folgenden Nummern erreichen Sie den hausärztlichen Notfalldienst rund um die Uhr:

  • 081 864 12 12 für die Region Scuol
  • 081 856 12 15 für die Region Zernez
  • 081 861 81 11 für die Region Samnaun

Unter der Nummer 081 861 10 00 erreichen Sie rund um die Uhr die Notfallstation des Ospidal.

Den nächsten AED-Standort im Unterengadin finden Sie auf unserer Übersicht.

REGA1414
Tox-Info145
Polizei117
Feuerwehr118
Dargebotene Hand143
Strassenzustand163
Lawinenbulletin187
Jugendnotruf147