Salvamaint professiunal da di e not
Il servezzan da salvamaint da l’ospidal es pront d’agir dürant 365 dis da tuottas uras. Alarmà vain sur il nomer da la centrala d’alarm 144.
Var 400 acziuns l’on praista il team da salvamaint. Il servezzan da salvamaint vain tschertifichà regularmaing da l’Interassociaziun da salvamaint (IAS). Cumpetenza e qualità sun garantidas uschè. In cas d’urgenza d’amalats in privel da vita sustegna ün team da meidis d’urgenza qualifichà al team da salvamaint. Illa staziun d’urgenza da l’ospidal assista il persunal da salvamaint als paziaints suvent eir inavant. Uschè nu’s müda la persuna da contact ed i’s fuorma üna cuntinuità chi procura per sgürezza.
Da Zernez fin a Martina
La regiun d’acziun chi vain chürada es geograficamaing vasta e s’extenda da Zernez fin a Martina. In basa a la geografia po ün viadi al lö d’acziun dürar fin a 25 minuts. A Zernez e Samignun sun staziunadas basas d’ambulanza. Ils veiculs d’ambulanza sun equipats tenor il standard il plü nouv. Paziaints greivamaing blessats o fich amalats pon uschè gnir chürats da maniera optimala al lö d’acziun e transportats in ün ospidal per l’ulteriur trattamaint.
A l’ospidal as rechatta üna plazza d’atterrar per elicopters. L’ospidal collavura strettamaing cun la Rega e cun l’ospidal chantunal dal Grischun a Cuoira. Grazcha ad exercizis regulars culs pumpiers, polizia, Rega, Salvamaint alpin svizzer ed oters partenaris es adüna garanti ün andamaint speditiv da las acziuns.
Staziun d’urgenza interdisciplinara
La staziun d’urgenza spordscha ün trattamaint d’urgenza adattà als paziaints, svelt e confuorm a las pretaisas odiernas. Per quai stan bun ün team fich specialisà da persunas qualifichadas e meidis.
Pro la staziun d’urgenza appartegnan tanter oter ün sectur da spettar cun ün chantunet d’uffants, locals da trattamaint, partiziun da radiografia e local d’ultrasun, labor e l’uschè nomnà local da schoc. Il local da schoc es equipà pel trattamaint da paziaints greivamaing blessats ed amalats in privel da vita cun tuot ils instrumaints da survivenza e pront per l’adöver da di e da not. Tuot las plazzas da trattamaint sun equipadas cun moniturs da survaglianza, oxigen, computer e clomada fliunza.
Ultra da quai vegnan trenats regularmaing cas d’urgenza cumplexs cul team da trattamaint grazcha a metodas da trenamaint fich modernas ed uschè augmantà essenzialmaing la sgürezza dal paziaint.
Digitalmaing bain collià illa rait
L’ospidal fa adöver d’üna tecnica digitala fich moderna. Ils moniturs pussibilteschan ultra d’üna masüraziun da la pressiun dal sang, dal puls e da la sadulezza da l’oxigen eir üna survaglianza cuntinuanta da l’ECG. Quistas datas pon gnir retrattas da mincha computer a l’ospidal cun agüd da la transmissiun radiofonica. Grazcha al nouv indriz da radiografar pon gnir examinats ils purtrets da radiografia e TC sün mincha monitur da computer.
Contact
Aldo Sala
manader da la partiziun acuta e MTTB
manader servezzan da salvamaint & staziun d'urgenza
Cas d'urgenza 144
Ella/El po ragiundscher da di e da not il servezzan medicinic d’urgenza suot ils nomers seguaints:
- 081 864 12 12 per la regiun da Scuol
- 081 856 12 15 per la regiun da Zernez
- 081 822 12 00 per la regiun da Samnaun
Ella/El po ragiundscher suot il nomer 081 861 10 00 da di e da not la staziun d’urgenza da l’ospidal.
Il prossem lö cun defibrillatur (AED) in Engiadina Bassa chatta Ella/El sün nossa survista.