Lavur voluntaria

Lavur voluntaria es üna contribuziun sociala importanta als conumans. Ella fuorma üna punt tanter umans chi sun pronts da regalar üna part da lur temp ed umans bsögnus. Las visitas da las voluntarias ed dals voluntaris sun variaziuns bainvgnüdas i’l minchadi da las abitantas e’ls abitants. Ultra da quai resultan contacts socials importants e nossas abitantas e noss abitants pon far part a quai chi capita dadour ils manaschis da chüra.

La lavur voluntaria cumplettescha e sustegna la lavur pajada e s’adatta a las situaziuns individualas e’ls bsögns da las abitantas e’ls abitants sco eir als giavüschs e las pussibiltats da las agüdantas ed agüdants. Es El/la interessada da s’ingaschar sco agüdanta voluntaria / agüdant voluntari? No vain plaschair sch’El/la ans contactescha: Sara Blumenthal, sara.blumenthal@cseb.ch, 081 861 21 00.

Activaziun

Nossas abitantas e noss abitants stan i’l center da nos far e nos agir. Per no esa important ch’els/ellas as saintan bain in noss manaschis da chüra e cha lur resursas gnian promovüdas e mantgnüdas uschè bain sco pussibel. L’activaziun ha quia üna rolla importanta sco elemaint per cumplettar üna chüra professiunala e cumplessiva. Las activitats dessan far plaschair, animar il spiert in möd ludic sco eir augmantar la confidenza e l’autostima e güdar a chattar il sen i’l minchadi da las abitantas e’ls abitants. Ultra da quai derasa ün’organisaziun dal minchadi variada ed activa plaschair da viver e dà energia. La partecipaziun activa o passiva a las sportas es voluntaria.

La sporta variada cumpiglia occurrenzas ed activitats e resguarda ils bsögns e giavüschs da las abitantas / ils abitants uschè sco las diversas stagiuns o las üsanzas da l’Engiadina Bassa.

Exaimpels d’activitats stimadas: gimnastica da la bunura, trenamaint da la memoria, chantar e far musica, cuschinar, ir a spass, lavur da üert, pitturar, zambriar e bler oter plü.