Fermada
La Clinica Curativa es integrada cumplettamaing illas localitats da l’ospidal.
Viadi d’arriv
Nus Tillas/Tils racumandain da far manar scha pussibel a paraints o cuntschaints illa clinica e d’ütilisar ils mezs da trafic publics. Üna fermada dal bus local as rechatta directamaing sper l’ospidal. Il planisader da rutas Tillas/Tils muossa la via pro nus. Per ir aint il veicul e gnir oura da quel pon dovrar paziaintas e paziaints la plazza da fermada pro l’entrada.
Plazzas da parcar
Las plazzas da parcar sper l’ospidal sun suottamissas a taxas. I nu stan a disposiziun ingünas plazzas da parcar permanentas.
Uras d’avertüra
Secretariat Clinica Curativa
Lündeschdi fin venderdi: 08.00 – 12.30
Recepziun ospidal
Lündeschdi fin venderdi: 07.00 – 20.00
Sonda e dumengia: 08.00 – 20.00
Stanzas da paziaints
Las stanzas sun drizzadas aint in möd confortabel e dispuonan d’ün local sanitari (duscha/tualetta), radio ed üna vista grondiusa süla cuntrada muntagnarda salubra da l’Engiadina Bassa.
Per paziaintas e paziaints cun sgüranza generala e mez privata stan a disposiziun stanzas grondas da duos, trais o quatter lets. Las stanzas nu sun selecziunablas libramaing, ma vegnan assegnadas.
Üna stanza singula po gnir reservada pajond ün predsch implü e tenor disponibilità. Schi’s less müdar in üna stanza singula as stoja arrandschar quai cul secretariat avant l’entrada. Il supplemaint per sgürats generals importa CHF 200.00 al di, per sgürats mez privats CHF 100.00 al di.
Persunas cun sgüranza privata vegnan allogiadas in stanzas singulas.
Program da terapia
Il program individual da terapia da la Clinica Curativa as drizza vi dals böts da sogiuorn da la paziainta o dal paziaint. El es üna part importanta dal concept da trattamaint.
Per accumplir las pretaisas da las chaschas d’amalats i’l rom da l’acconsentimaint dals cuosts, cuntegna mincha program d’eivna almain 450 minuts da terapia, saja quai individual o in gruppa. Il program da terapia es impegnativ per paziaintas e paziaints, la dumengia es sainza terapia.
Il plan da l’eivna schematic demuossa, che chi spetta a paziaints e paziaintas – pro’l program da terapia
Cuschina
Nos schef da cuschina resguarda insembel cul team da trattamaint las intoleranzas ed allergias. In cas da bsögn tratta il schef da cuschina cun la cusgliadra da nudrimaint las pussibiltats da pudair cuschinar, adonta da restricziuns, ün damangiar gustus e san.
Cafetaria
Pels collavuraturs e las visitas dals paziaints o abitants sta a disposiziun üna cafetaria. Qua pon ils paziaints cun lur paraints as laschar gustar ün giantar delizchus in ün’atmosfera prüvada.
Secretariat Clinica Curativa
Inga Marty
manadra secretariat Clinica Curativa
Cas d'urgenza 144
Ella/El po ragiundscher da di e da not il servezzan medicinic d’urgenza suot ils nomers seguaints:
- 081 864 12 12 per la regiun da Scuol
- 081 856 12 15 per la regiun da Zernez
- 081 822 12 00 per la regiun da Samnaun
Ella/El po ragiundscher suot il nomer 081 861 10 00 da di e da not la staziun d’urgenza da l’ospidal.
Il prossem lö cun defibrillatur (AED) in Engiadina Bassa chatta Ella/El sün nossa survista.