Assistenza al part a l’ospidal a Scuol

Parturir in ün’atmosfera protetta e persunala – quai pussibilteschan las duonnas da part versadas e’l meidi specialist per ginecologia ed assistenza al part.

A l’ospidal vegnan fattas da di e da not tuot las consultaziuns ed intervenziuns importantas. Ün’assistenza individuala es garantida.

Gravidanza e preparaziun al part

Sgürezza e fiduzcha sun duos cumponentas importantas pro üna gravidanza e naschentscha. Las duonnas da part a l’ospidal mettan grond pais sün üna relaziun familiara e s’occupan individualmaing dals bsögns da las mammas in gravidanza. Grazcha als cuors preparatorics chi han lö minch’eivna po gnir creada üna relaziun persunala cun las duonnas da part. Quai pissera per sgürezza e fiduzcha. I regna ultra da quai ün contact constant cul servezzan medical. In cas d’urgenza sun tuot ils meidis specialists necessaris infra fich cuort temp sül lö.

Ulteriuras infuormaziuns davart la spüerta da cuors

Parturir in ün’atmosfera protetta

Illa sala da parturir vain chürada la duonna in spranza permanentamaing. L’assistenza cumplessiva cuntegna eir metodas alternativas, sco aromaterapia o omeopatia. I stan a disposiziun ün let da parturir, üna bognaduoira da parturir, ün taburè Maya, la balla Pezzi e la s-chalera. Per üna naschentscha sainza dolurs vain spüerta da tuottas uras ultra da quai ün’anestesia peridurala (PDA) dals meidis specialists da la partiziun d’anestesiologia.

Protets dürant la paglioula

Davo la naschentscha pon as recrear la mamma e l’uffant illas bellas stanzas cleras da la partiziun da paglioula. Rooming-in es standard. L’uffantin po eir gnir chürà ad uras illa stanza da poppins. Üna stanza da famiglia sta a disposiziun tenor cunvegna.

Las uras da visita sun mincha di da las 14.00 fin a las 19.00.

Ura da consultaziun per l’assistenza al part

Il meidi specialist po far las examinaziuns seguaintas:

• diagnosa ad ultrasun prenatala
• sonografia culur-duplex (controlla da la circulaziun dal sang da la placenta e dal manaströl)
• test da prüm tremester
• puncziun da l’aua da la vaschia per sclerir disturbis dal cromosom
• sonografia 3D/4D (reproducziun tridimensiunala da l’uffant i’l sain da la mamma)

Consultaziun ginecologica

La spüerta ginecologica cumpiglia ultra da l’assistenza al part tuot il spectrum ginecologic, d’examinaziuns preventivas fin ad operaziuns:

• examinaziun preventiva ginecologica
• sonografia ginecologica (ultrasun)
• mammasonografia
• examinaziun da disturbis ormonals ed anomalias dal ciclus
• examinaziun e terapia in cas da mals climacterics
• operaziuns ambulantas e staziunarias
• terapia conservativa ed operativa da l’incontinenza da la vaschia
• operaziuns endoscopicas (examinaziun da madra e vainter)