Spüerta da cuors – ils profis sun qua per Ella/El …

Preparaziun a la paglioula

In noss cuors per preparar la paglioula preparain nus a genituors futurs a la naschentscha cun ans dedichar concretamaing als differents temas e bsögns individuals. Els inscuntran a persunas da medemma opiniun, han la pussibiltà d’imprender a cugnuoscher nossa partiziun da parturir e da barattar experienzas.

Cuntgnü dal cuors

Las lecziuns sun trapartidas in teoria, pratica e recreaziun:

• batschigl e fuond dal batschigl cun üna fisioterapeuta
• respiraziun e simulaziun da las döglias
• metodas per surleivgiar il mal, anestesia peridurala (cun partenari)
• andamaint da la naschentscha, gir tras la sala da parturir (cun partenari)
• posiziuns da naschentscha, fasa d’avertüra e d’expulsiun, cumplicaziuns
• dar bruost a l’uffant, nouvnaschü, paglioula
• exercizis pratics per la naschentscha (cun partenari)

Termins
Ils cuors han lö tenor bsögn ed a partir d’almain trais partecipantas. Per ulteriuras infuormaziuns s’annunzchar per plaschair sün nossa website o as volver directamaing al secretariat per ginecologia ed assistenza al part. Cuors actuals vegnan publichats qua .

Cuosts
Ils cuosts dal cuors importan CHF 300.00 per 7 lecziuns dad ün’ura, incl. material dal cuors. A partir da la seguonda naschentscha spordschain nus eir cuors scurznits. Las chaschas d’amalats e/o sgüranzas supplementaras pon as partecipar als cuosts. Ch’Ella s’infuorma per plaschair scha Sia chascha d’amalats as partecipescha. Nus Tilla cusgliain e sustgnain gugent in quist connex.

Tour cun sai
Büschmainta cumadaivla, locca e soccas chodas.

Per s’annunzchar

Gimnastica postnatala

Cun la naschentscha d’ün uffant as müda tant il corp da la duonna sco eir sia rolla illa famiglia e società. Ella sto uschè s’orientar da nouv e s’adattar, quai chi’d es üna sfida pretensiusa.
La musculatura, pustüt il fuond dal batschigl, es gnüda strapatschada cun la gravidanza e la naschentscha. Rain e spadlas sun uossa indeblidas da la posiziun cun dar bruost e la butiglia sco eir cun portar l’uffant. Radschunaivel esa dimena da far attenziun da corp ed orma, quai per chattar darcheu l’equiliber.

Cuntgnü dal cuors

• Exercizis intenziunats per badar il corp sco eir gimnastica calma per rinforzar la musculatura dal fuond dal batschigl, dal vainter e da la rain
• Imprender la savüda da basa davart la lavur postnatala e savair co cha quista po gnir pratichada i’l minchadi
• Schlockiada e sustegn pro la recuperaziun dal sentimaint corporal
• Barat cun otras mammas giuvnas

Termins
Ils cuors han lö tenor bsögn ed a partir d’almain quatter partecipantas. Per ulteriuras infuormaziuns s’annunzchar per plaschair sün nossa website o as volver directamaing al secretariat per ginecologia ed assistenza al part. Cuors actuals vegnan publichats qua .

Cuosts
Ils cuosts dal cuors importan CHF 150.00 per 5 lecziuns dad ün’ura, incl. material dal cuors. Las chaschas d’amalats e/o sgüranzas supplementaras pon as partecipar als cuosts. Ch’Ella s’infuorma per plaschair scha Sia chascha d’amalats as partecipescha. Nus Tilla cusgliain e sustgnain gugent in quist connex.

Tour cun sai
Büschmainta cumadaivla, soccas chodas ed ün süaintamans grond.

Per s’annunzchar