Exposiziun Rudolf Glaser e Vernisascha

Cordial bainvgnü!

Ella/El s’interessa per ün sustegn dürabel e vast da l’Ospidal d’Engiadina Bassa?

Lura es Ella/El qua precis al güst lö!

Nossa società ha per mera il mantegnimaint da la spüerta importanta a l’ospidal – hoz ed in avegnir, per indigens e giasts. Nus fain quai i’l sectur politic e finanzial, fain PR in occasiun d’arrandschamaints regiunals ed ans ingaschain eir persunalmaing in cas chi douvra agüd.

L’ospidal offra üna spüerta cumplessiva chi’d ha üna gronda importanza per nossa regiun perifera. A partir da la naschentscha e dürant la vita s’esa adüna darcheu o eir suvent dependent d’avair in vicinanza ün vast provedimaint da medicina e da chüra. Quai schligerischa dad ir a l’ospidal, po salvar la vita in ün cas urgiaint e pissera eir cha persunas in situaziuns d’urgenza pon restar in vicinanza da lur famiglia. Quai po contribuir tanter oter essenzialmaing a la guarischun ed in mincha cas promouver il bainesser. Eu Tilla/Til stun gugent a disposiziun sch’Ella/El less gnir a savair daplü da nossa lavur e güdar a nus in quist reguard. Grazcha fich!

Seraina Bickel
presidenta

Böts da la società

La società “Amias & Amis da l’Ospidal d’Engiadina Bassa” chi’d es gnüda fundada als 3 settember 2003 ha in mera da promouver la fiduzcha da la populaziun in seis agen ospidal e da til francar illa conscienza dals giasts. Ultra da quist agüd ideal perseguitescha la società il sustegn pratic e material da l’ospidal. Quist cumpiglia la procuraziun resp. il parderdscher da mezs finanzials per progets orientats als paziaints e collavuraturs. Da la società fan part var 300 commemberse commembras; ellas/els derivan surtuot da l’Engiadina Bassa, mo eir dad otras parts da la Svizra.

Cun Sia commembranza illa società sustegna Ella/El noss böts e noss interess, cun donaziuns s’augmaintan nossas pussibiltats. Grazcha fich.

Suprastanza

• Seraina Bickel, Susch (presidenta)
• Anna Barbla Buchli, Sent
• Annina Mengiardi, Ardez
• Ursina Caviezel, Tschlin
• Leta à Porta, Scuol (actuara)
• Seraina Bezzola, Zernez (chaschiera)
• Martin Büsing, Scuol (vicepresident & rapreschantant dals meidis domiciliats)
• Joachim Koppenberg, rapreschantant da la direcziun da l’ospidal

Relaziun bancara

Banca Chantunala Grischuna, 7002 Cuoira
Amias & Amis da l’Ospidal d’Engiadina Bassa
FreundInnen & Freunde des Ospidal d’Engiadina Bassa
7550 Scuol

IBAN: CH28 0077 4110 4125 1500 0

Activitats – progets sustgnüts

Pro’ls progets realisats cun success appartegnan tanter oter:

• Cofinanziaziun dal proget da teater ARTABANA.
• Cofinanziaziun da l’ambulanza da giovarets pel üert da sandà.
• Ingaschamaint per la votaziun davart il fabricat nouv dal tract d’operaziuns e la renovaziun da la plazza d’atterrar per elicopters.
• Sustegn per indrizzar üna pratcha ginecologica a l’ospidal.
• Ingaschamaint per s-chaffir üna partiziun per medicina cumplementara e chüra palliativa.
• Organisaziun da referats publics cun exponents importants dal sectur da la sandà.
• Equipamaint d’ün chantun da giovar per uffants illas stanzas d’aspet da la staziun d’urgenza e dal nouv tract d’operaziuns.
• Sustegn pel proget: Iglüminaziun tamprada illa stanza da parturir «buna glüm per mamma ed uffant».
• Sairada d’inscunter e da concert culs „Fränzlis da Tschlin“.
• Preschentscha al giubileum da 100 ons da l’ospidal.
• Cofinanziaziun d’arrandschamaints da persunal.
• Contribuziuns per perfecziunamaints.