Cordial bainvgnü pro la Gruppa da cours Engiadinaisa

Ils böts principals da la società chi’d es gnüda fundada l’on 2000 sun da promouver la prevenziun cardiovasculara e da reabilitar a paziaints cun malatias cardiovascularas illa regiun d’Engiadina Bassa.

La Gruppa da cours Engiadinaisa spordscha a paziaints cun facturs da ris ch cardials (p.ex. cun üna pressiun dal sang ota e colesterin o cun surpais), davo ün infarct dal cour, davo operaziuns per cateters cardiologics o operaziuns dal cour, cun insufficienza dal cour ed eir a paziaints davo ün cuolp dal tscharvè o cun otras malatias vascularas (p.ex. stretnidas da las arterias da las chommas) ün trenamaint cardiovascular regular adattà individualmaing ed organisescha periodicamaing divers arrandschamaints d’infuormaziun davart aspets importants d’ün möd da viver chi’d es san pel sistem cardiovascular. Ün böt important es eir il barat vicendaivel e’l contact persunal illa gruppa da cours stessa. Suvent esa plü simpel dad esser insembel corporalmaing activ.

Sch’Ella/El svess less as partecipar a las activitats da la gruppa da cours o sustegner quista finanzialmaing, lura es Ella/El cordialmaing bainvgnü/-da da dvantar commember/-bra da nossa società. Infuormaziuns plü detagliadas survain Ella/El pro’l secretariat da la società da duonna Claudia Crastan o dal president da la società Gian Flury (guarda contacts).

Suprastanza e caricas

• Gian Flury (president)
• Elke Cloet (terapeuta dal cour)
• Marianne Koppenberg (terapeuta dal cour)
• Renate Mietrup (terapeuta dal cour)
• Claudia Crastan (secretariat)
• Flavia Kienz (chaschiera)
• Linard Neuhäusler (revisur)

Relaziun bancara

Banca Raiffeisen, Engiadina Val Müstair, 7530 Zernez
Gruppa da cours Engiadinaisa

IBAN: CH87 8114 4000 0301 9917 8

Per chi es la Gruppa da cours Engiadinaisa – e che fa’la?

Illa gruppa da cours s’inscuntran paziaintas e paziaints cun malatias cardiovascularas, per exaimpel davo ün infarct dal cour, cuolp dal tscharvè, operaziun da la clappa dal cour, cun disturbis dal ritmus dal cour, pressiun dal sang ota e.o.p. Üna jada l’eivna mainan fisioterapeutas cun üna scolaziun speciala (uschè nomnadas terapeutas dal cour) ün program da movimaint illa sala da gimnastica da la fisioterapia da l’ospidal. Ellas fan tuot il pussibel ch’Ella/El possa s’acquistar o amegldrar darcheu Sia abiltà da prestaziun corporala. La gruppa da cours nu promouva però be la fitness e la sandà corporala, dimpersè güda eir cha l’orma tegna l’equiliber. Suvent as sviluppan uschè contacts prezius davart las activitats da la gruppa da cours.

Ultra dal program da movimaint survain Ella/El illa gruppa da cours ulteriuras intimaziuns per ün stil da viver cun ün cour san:

• Viver sainza fümar
  Sch’Ella/El desista da fümar, nu redüa Ella/El be il ris-ch d’üna malatia cardiovasculara, mo eir quel d’ün disturbi da la circulaziun dal sang da las arterias illas chommas, d’ün cuolp dal tscharvè, d’üna bronchita cronica o d’ün cancar dals pulmuns.
• Mangiar per ün cour san
  Ün nudrimaint per ün cour san ha tuot in tuot ün effet positiv sün Sia sandà e Tilla/Til güda a tgnair suot controlla Seis pais dal corp, il zücher dal sang, la pressiun dal sang e’ls grass aint il sang.
• Detensiun per corp ed orma
  L’imprender metodas da detensiun Tilla/Til spordscha üna pussibiltà preziusa per gnir a tapin cun squitsch psichic e stress.