Reabilitaziun

Dspö l’on 2016 spordscha il Center da sandà Engiadina Bassa (CSEB) programs da reabilitaziun integrativs oncologics, medicinals e psicosomatics. La medicina integrativa as basa sün ün purtret da l’uman cumplessiv.

Corp, orma e spiert vegnan integrats illa diagnostica e’l trattamaint. Illa metoda da terapia integrativa vain colliada la medicina cumplementara actuala cun la medicina classica. Quist succeda sün ün ot nivel professiunal.

Scuol es situà illa regiun dal Parc Naziunal – üna regiun da sandà incumparabla. In üna cuntrada genuina sbuorflan funtanas d’aua minerala salüdaivlas. Lös da forza invidan a’s trategner. Üna natüra intacta dà quietezza e forza. Lapro vain ün clima chi promouva la sandà sün 1200 meters sur il nivel dal mar. Scuol es ün lö ideal per la reabilitaziun e la guarischun. La natüra e la tradiziun da bogns dürant tschientiners vegnan integradas illa Clinica Curativa activamaing i’l minchadi da trattamaint.

Reabilitaziun integrativa oncologica

Grazcha a la diagnosa a temp e metodas da trattamaint fich effectivas s’ha augmantada in congual cun da plü bod evidaintamaing l’aspettativa da vita da pertocs dal cancar. Operaziuns e chemoterapias restrendschan suvent la qualità da viver dals paziaints. Illa reabilitaziun vain miss insembel ün program da terapia orientà a l’individualità. Quist güda al paziaint ad activar darcheu las forzas vitalas.

La spüerta cumpiglia:

• trattamaints posteriurs da paziaints cun üna terapia oncologica finida
• preparaziun per üna terapia oncologica difficila (operaziun, chemoterapia)
• trattamaint da restricziuns per motivs d’ün tumor o d’üna terapia, resp. da cumplicaziuns corporalas e psichicas
• trattamaint cun üna terapia da vis-cha

Ulteriuras infuormaziuns

Reabilitaziun integrativa psicosomatica

Squitsch ed impedimaints psichics pon chaschunar üna malatia corporala. Viceversa pon cumparair in connex cun malatias internisticas simptoms psichics e difficultats d’adattaziun. La paletta da mals pussibels tendscha da sindroms da stanglantüm e d’indeblimaint, depressiuns e temma fin a simptoms chi nu sun declerabels in basa ad üna malatia corporala.

La spüerta cumpiglia:

• trattamaint da paziaints cun sindroms psicosomatics, pels quals be il trattamaint medicinal nun es impromettant
• stadis chi tardiveschan l’andamaint da guarischun causa ün impedimaint psichic
• situaziuns, per las qualas terapias ambulantas nu sun plü sufficiaintas e chi pretendan üna distanza da l’ambiaint social per garantir üna guarischun plü svelta.

La paletta da mals pussibels:

• sindroms da stanglantüm
• burnout, malatias per consequenza da stress
• dolurs chi nu’s riva da declerar
• temma e depressiun
• sindroms da crisa e da squitsch
• disturbis dal sön
• stanglantüm cronica
• sturnizi o tachicardia
• mals dal stomi e dal bögl
• privel d’infecziuns

Ulteriuras infuormaziuns

Reabilitaziun integrativa internistica

Malatias dal tract digestiv, dal sistem cardiovascular, dals organs da respiraziun, dals ranuogls e da las vias urinaras e bler oter plü pon indeblir las forzas ed avair ün andamaint stantus.

La spüerta cumpiglia:

• trattamaint posteriur da greivas malatias o operaziuns
• trattamaint da malatias cun ün stadi da deblezza psicofisic
• trattamaint in cas d’alimentaziun mangluossa
• trattamaint in cas da purtrets da la malatia cronics internistics sco malatias cronicas dal tract digestiv, malatias dals pulmuns, ipertonia o diabeta

Ulteriuras infuormaziuns