Wellness

I’l Bogn Engiadina nu pon Ellas/Els be far bogns e süar, Ellas/Els pon eir as laschar maladüsar in möd magnific. Listess co ch’Ellas/Els decidan: Ellas/Els vegnan adüna cusgliats e trattats persunalmaing ed individualmaing. Per quist motiv sun trattamaints da wellness be pussibels tenor cunvegna, reservar pon Ellas/Els Lur termin per telefon o per online. Quistas prestaziuns nu vegnan surtuttas da la sgüranza da basa. Ch’Ellas/Els s’infuorman pro Lur chascha d’amalats.

La spüerta dals trattamaints i’l center da wellness

Massascha classica

La massascha serva a l’influenza mecanica da la pel, dal tessü congiuntiv e da la musculatura cun stimular l’elasticità, cun strar e schmachar. L’effet da la massascha s’extenda dal lö trattà dal corp sur l’inter organissem e rinserra eir la psica.

Massascha da las zonas da reflex dal pè

La massascha da las zonas da reflex dal pè es üna fuorma speciala da la massascha da las zonas da reflex, pro la quala vegnan trattadas zonas da reflex specialas dals peis per rinforzar las forzas autocurativas ed equilibrar ils sistems da regulaziun da basa da l’uman.

Massascha da la spina dorsala tenor Breuss

La massascha tenor Breuss es ün trattamaint fin e sensibel da la spina dorsala. Sco massascha da la rain energetic-manuala po ella schlockiar bloccadas mentalas, energeticas e corporalas e s’adatta stupend per schlockiar musculatura aira.

Massaschas cun aromas

Üna massascha armonisanta cun substanzas odurantas vegetalas güda a mantegner, respectivamaing ad amegldrar il bainesser fisic e psichic.

Massascha dschember vital

Pro la massascha dschember vital vegnan applichats bastunets da dschember da differenta lunghezza e cun divers diameters, s-chodats e per ün’ota detensiun vain dovrà ün lat da massascha dschember (arnica o meil). Il chod dals bastunets da dschember sco eir il lat da massascha dschember penetreschan chafuol illa vetta musculara ed amegldreschan la circulaziun da tuot il corp, promouvan la flussiun energetica e mainan ad üna schlockiada in cas da staisas e bloccadas.

Bogn d’acid carbonic

Aint il center da terapia dal Bogn Engiadina Scuol vain dovrada l’aua curativa in fuorma da batschigls da bogn singuls tenor aspets da la medicina. Las funtanas termalas chi vegnan ütilisadas qua muossan concentraziuns d’acid carbonic bler plü otas co la media al cunfin da saduraziun. L’aua curativa serva tanter oter per promouver la circulaziun e per calmar il sistem da la nerva. Ultra da quai ha ella ün effet chi mitigescha la dolur e difficultescha malatias bacterialas.

Fascha da flus

Flus sun fluors da differentas erbas. La fascha da flus es üna veglia masdina da chasa chi promouva la circulaziun dal sang, mitigescha la dolur, calma e schloccaja.

Drenascha manuala da las limfas

La drenascha da las limfas es üna tecnica manuala pel trattamaint dad edems. Edems sun ufladüras dal tessü in consequenza da retenziun da liquids e limfas, pelplü illa bratscha o illas chommas. Cun la drenascha da las limfas da las regiuns dal corp pertoccas vegnan transportats davent ils liquids retgnüts, las ufladüras van inavo. Quist po gnir sustgnü cun bandaschas da cumpressiun.

Massascha dal meridian d’acupunctura (MMa)

La massascha dal meridian d’acupunctura es ün trattamaint energetic chi cumbina il pensar oriental e quel occident. D’importanza centrala sun las cugnuschentschas da 5000 ons medicina chinaisa tradiziunala e da sia scoula d’acupunctura. Intant cha l’acupunctura tratta singuls puncts intenziunadamaing cun aguoglias, as lavura illa MMa sainza aguoglias, dimena «na sanguinus». A listess mumaint nu’s tratta be ils singuls puncts, dimpersè l’inter decuors meridian cun üna pitschna bachetta da metal speciala.

Ulteriuras spüertas

Scuol e Tarasp han üna lunga tradiziun da lös da cura. Las 20 funtanas d’aua minerala a Scuol attraivan amo avant 100 ons a persunalitats da tuot l’Europa. La büvetta serrada a Nairs es üna perdütta dal temp impreschiunanta da quel temp. I’l Bogn Engiadina cuntinua la tradiziun cun bogn d’aua minerala e cura da baiver aua.

A la spüerta appartegnan:

Curas da bogn e da recreaziun

Las funtanas d’aua minerala da Scuol e Tarasp attiran fingià daspö tschientiners a giasts in Engiadina Bassa. Fingià dal 1369 sun gnüdas manzunadas in scrit la prüma jada las funtanas d’aua minerala e lur forza curativa.