Turissem da sandà pissera per dürabilità

Il turissem da sandà es ün trend da l’avegnir. Il CSEB collia sias spüertas fingià daspö l’on 2011 cun spüertas turisticas.

La mera es ün svilup dürabel per la regiun. Eir qua ha la regiun perifera da l’Engiadina Bassa prestà lavur da pionier. La Regiun dal Parc Naziunal s’ha stabilida dürant ils ultims ons sco regiun da sandà. La cuntrada natürala e culturala intacta cumpiglia ün grond potenzial per ün svilup dürabel. Las experienzas dal CSEB fuorman eir üna basa per la lavur da la gruppa directiva pel turissem da sandà dal chantun Grischun.

Las fermezzas da la regiun sun:

• ün’agricultura in accord cun la natüra
• ün turissem orientà a la valur ed als sens
• provedimaint da sandà innovativ
• ün’infrastructura bain sviluppada

Il turissem da sandà vala sco ün marchà da l’avegnir e da creschentscha. El spordscha a la Regiun dal Parc Naziunal – a l’Engiadina Bassa ed a la Val Müstair – nouvas schanzas. La Regiun dal Parc Naziunal ha las megldras premissas per as posiziunar cun success sül marchà. Ella dispuona d’üna vasta spüerta i’ls secturs dal turissem e da la sandà, sco eir da wellness e sport.

Regiun dal Parc Naziunal – regiun da sandà

Per trar a nüz il potenzial dal marchà dal turissem da sandà es gnü lantschà l’on 2011 il proget “Regiun dal Parc Naziunal – regiun da sandà”. I’s tratta da cumbinar e da commercialisar il cuntgnü da las spüertas da la regiun al punct da colliamaint tanter sandà e turissem. Cun quai esa pussibel da guadagnar nouvs segments da giasts. Quists mainan da lur vart ad ün augmaint da valur plü grond. Culs rechavs implü ed üna megldra occupaziun i’l sectur da sandà regiunal po gnir garantida a lunga vista la portabilità dal provedimaint da sandà per la populaziun indigena.

Ün exaimpel per üna nouva spüerta cun success da la “Regiun dal Parc Naziunal – regiun da sandà” sun vacanzas per giasts cun celiakia o intoleranza da lactosa.

Illa regiun da vacanzas Scuol Samignun Val Müstair s’ha fuormada üna rait da passa 30 furniturs da prodots sainza gluten e lactosa. Actualmaing spordschan 14 hotels, 18 restorants, 10 abitaziuns da vacanzas ed ot affars o cafetarias prodots sainza gluten/lactosa – da Müstair a Scuol fin in Samignun. Quist proget es gnü undrà cul „aha! Award 2016“.